މާލެ ސަރަޙައްދުގައި ތަރައްޤީކުރާ ޕާކިންގ ޢިމާރާތްތައް އަންނަ އަހަރުގެ ނޮވެމްބަރަށް ނިންމުމަށް އަމާޒު ހިފާފައިވާ ކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވެވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ވަޒީރު ވިދާޅުވީ، ހީނާމާގޭ ބިމުގައި އެޅުމަށް ހަމަޖެހިފައިވާ ޕާކިންގ ޢިމާރާތުގެ އެންމެ ފަހުގެ ތައްޔާރީތައް ކޮންޓްރެކްޓަރާއެކު މިހާރު ކުރިއަށްދާ ކަމަށެވެ. އަދި ދެވަނަ ޢިމާރާތް ކަމަށްވާ، ސޯސަންމަގުގައި ހުންނަ ދިވެހިރާއްޖޭގެ ޤައުމީ ޔުނިވަރސިޓީ ކައިރީގައި އަޅާ ޕާކިންގ ބިލްޑިންގގެ ފައިނަލް މަރުޙަލާ ނިމި، ކުރިއަށް އޮތް ކުރު މުއްދަތެއްގެ ތެރޭގައި ކޮންޓްރެކްޓަރަކާ ޙަވާލުކުރެވޭނެ ކަމަށްވެސް އެމަނިކުފާނު ފާހަގަކުރެއްވިއެވެ. މި ދެ ޢިމާރާތުގެ މަސައްކަތްވެސް އަންނަ އަހަރުގެ ނޮވެމްބަރު މަހުގެ ނިޔަލަށް އެއްކޮށް ނިންމުމަކީ ސަރުކާރުގެ މައިގަނޑު އަމާޒެކެވެ.
މާލެ ސަރަޙައްދަށް ދިމާވެފައިވާ ޕާކުކުރުމުގެ ދަތިކަމަށް ދާއިމީ ޙައްލެއް ހޯދައިދިނުމަށްޓަކައި، މާލެ، ވިލިމާލެ އަދި ހުޅުމާލެ ހިމެނޭހެން ޖުމްލަ 7 ޕާކިންގ ޢިމާރާތެއް އެޅުމަށް ސަރުކާރުން ދަނީ މަސައްކަތް ކުރަމުންނެވެ. މި މަޝްރޫޢުތައް ފުރިހަމަވުމުން، ހަތަރު ފުރޮޅުލީ އުޅަނދުތަކަށް 2،600 އަށްވުރެ ގިނަ ޖާގަ އަދި ސައިކަލު ފަދަ ދެ ފުރޮޅުލީ އުޅަނދުތަކަށް 1،000 ޖާގަ ތަނަވަސްވެގެންދާނެއެވެ.
މީގެއިތުރުން، ވެރިރަށް މާލޭގެ ހަނި މަގުތަކުގެ ޑިޒައިނަށް ހެޔޮ ބަދަލުތަކެއް ގެނެސް، އުޅަނދުތައް ޕާކުކުރުމަށް ލުއިފަސޭހަ އިންތިޒާމުތަކެއް ހަމަޖެއްސުމުގެ މަސައްކަތް ފައްޓަވާފައިވާ ކަމަށްވެސް ވަޒީރު ވިދާޅުވިއެވެ. އެގޮތުން، ފުރަތަމަ ފިޔަވަހީގައި ހަތަރު މަގެއް އަލުން ޑިޒައިން ކުރުމުގެ ޕްލޭންތައް އެކުލަވައިލަމުންދާ ކަމަށާއި، މި ބަދަލުތައް ގެންނާނީ ފަންނީ ދިރާސާތަކާއި ޢާންމު ރައްޔިތުންގެ ޚިޔާލާއި މަޝްވަރާގެ މަތިން ކަމުގައި ވަޒީރު ސަޢީދު ފާހަގަކުރެއްވިއެވެ.
