ރާއްޖެއިން ގަވާއިދާ ހިލާފަށް ބޭރުކުރަން އުޅުނު ގިނަ އަދަދެއްގެ ބޭރު ފައިސާ، ދިވެހިރާއްޖޭގެ ކަސްޓަމްސް ސަރވިސްގެ ބެލުމުގެ ދަށަށް ގެނެސްފި އެވެ.
މިކަމާ ގުޅޭގޮތުން ކަސްޓަމްސްއިން މައުލޫމާތު ދީފައިވާ ގޮތުގައި، މިދިޔަ ބުދަ ދުވަހު ވެލާނާ އިންޓަރނޭޝަނަލް އެއަރޕޯޓުން ރާއްޖެއިން ބޭރަށް ފުރުމަށް ދިޔަ އިންޑިއާ ނަސްލުގެ ފަސިންޖަރެއްގެ އަތުން، ކަސްޓަމްސްއަށް އެންގުމެއް ނެތި ބޭރުކުރަން އުޅުނު 905,669.80 (ނުވަ ލައްކަ ފަސް ހާސް ހަ ސަތޭކަ ފަސްދޮޅަސް ނުވަ ރުފިޔާ އައްޑިހަ ލާރި) އަށްވާވަރުގެ ބޭރު ފައިސާ ވަނީ ހިފަހައްޓާފަ އެވެ. ހިފަހައްޓާފައިވާ ފައިސާގެ ތެރޭގައި އެކި ގައުމުތަކުގެ ކަރަންސީ ހިމެނޭ ކަމަށް ކަސްޓަމްސްއިން ބުނެ އެވެ.
ޤަވާއިދާ ޚިލާފަށް ރާއްޖެއިން ބޭރުކުރަން އުޅުނު 09 ލައްކައަށްވުރެ ގިނަ ރުފިޔާއާ އެއްވަރުގެ ބޭރު ފައިސާ ކަސްޓަމްސްއިން އަތުލައިގެންފި. pic.twitter.com/O7nXw3rE0z
— Maldives Customs Service (@CustomsMv) October 12, 2026
ގަވާއިދާ ހިލާފަށް ބޭރު ފައިސާގެ މުއާމަލާތްތައް ކުރާ ފަރާތްތައް ދެނެގަނެ، ގާނޫނީ ފިޔަވަޅު އެޅުމަށް ކުރަމުންދާ މަސައްކަތުގެ ތެރެއިން، މި ފަހުން ވަނީ ގިނަ އަދަދެއްގެ ބޭރު ފައިސާއާ އެކު ބަންގްލަދޭޝްގެ ހަ ފިރިހެނުން ހައްޔަރުކޮށްފަ އެވެ. މީގެ އިތުރުން، ހުއްދަ ނެތި ބޭންކިންގ ހިދުމަތް ދިނުމުގެ މައްސަލައަކާ ގުޅިގެން، މިދިޔަ އަންގާރަ ދުވަހު ފުލުހުން ވަނީ ހަތަރު ބިދޭސީންނާއި ދިވެއްސެއްގެ ތަންތަން ބަލައި ފާސްކޮށްފަ އެވެ.
