ދުނިޔޭގެ ފުޓްބޯޅަ ތާރީޚު ދުށް އެންމެ މޮޅު އަދި އެންމެ ކާމިޔާބު އެއް ކުޅުންތެރިޔާ ކަމަށްވާ ލިއޮނެލް މެސީ، ފަޚުރުވެރިކަމާއި ހިތްހަމަޖެހުމާއެކު އާޖެންޓީނާގެ ޤައުމީ ޓީމަށް ކުޅުން ހުއްޓާލައިފިއެވެ. ޤައުމީ ޖަރޒީގައި ކުޅުނު ފަހު މެޗަށްފަހު ވާހަކަދައްކަމުން މެސީ ބުނީ، އޭނާ ޤައުމީ ޓީމާ ވަކިވަނީ ފުރިހަމަ ހިތްހަމަޖެހުމާއެކު ކަމަށާއި، ނަމަވެސް ޤައުމީ ޓީމަށް ކުޅުނު ކޮންމެ ވަގުތެއްގެ މަތިން އަބަދުވެސް ހަނދާންވާނެ ކަމަށެވެ. އަދި ޓީމުގެ އެކުވެރި ކުޅުންތެރިންނާއި، ސަޕޯޓަރުންގެ މަތިން އަބަދުވެސް ހަނދާން ހުންނާނެ ކަމަށާއި، މިހާރު ޓީމުގައި ތިބި އަދި ކުރިއަށް އޮތް ތަނުގައި ޤައުމީ ޖަރޒީ އަޅާނެ ކޮންމެ ކުޅުންތެރިއަކަށްވެސް އޭނާގެ ފުރިހަމަ އެއްބާރުލުމާއި ސަޕޯޓް އަބަދުވެސް ލިބޭނެ ކަމުގެ ޔަޤީންކަން މެސީ ދިނެވެ.
މެސީ ފާހަގަކުރި ގޮތުގައި، ވޯލްޑް ކަޕާއި ކޮޕާ އެމެރިކާ އަދި ފައިނަލިސިމާ ފަދަ ބޮޑެތި މުބާރާތްތައް ކާމިޔާބު ކުރެވުމަކީ ލިބުނު ވަރަށް ބޮޑު އުފަލެކެވެ. ނަމަވެސް ޤައުމީ ޓީމުގެ ކާމިޔާބީގެ ދަތުރަކީ ހަމައެކަނި 2022 ވަނަ އަހަރުގެ ވޯލްޑް ކަޕް ކާމިޔާބުކުރުން ނޫން ކަމަށާއި، އެއީ އެ ކާމިޔާބީއާ ހަމައަށް ވާސިލުވުމަށް އެތައް ކުޅުންތެރިންނަކާއި އޮފިޝަލުން ކުރި ދިގު އަދި ބުރަ މަސައްކަތުގެ ނަތީޖާ ކަމަށް އޭނާ ބުންޏެވެ.
” ޤައުމީ ޓީމަށް ކުޅުން އަހަރެން އަބަދުވެސް ވަރަށް ބޮޑަށް މިސްވާނެ. ތިޔަ އެންމެހައި ސަޕޯޓަރުން ދެކެ އަހަރެން ނުހަނު ލޯބިވޭ. އަހަރެން އާޖެންޓީނާއަށްޓަކައި އަބަދުވެސް ފަޚުރުވެރިވަން. އަދި އާޖެންޓީނާއަށް އުފަންވީތީ އަބަދުވެސް ޝުކުރުވެރިވަން “ޖަޒުބާތުން ފުރިގެންވި ރޫޙެއްގައި މެސީ ބުންޏެވެ.
މެސީގެ ވަދާއީ މެޗަކީ އާޖެންޓީނާގެ ކުޅުންތެރިންނާއި އޮފިޝަލުންނަށް ޖަޒުބާތުން ފުރިގެންދިޔަ މެޗެކެވެ. މެޗުގެ 10 ވަނަ މިނެޓުގައި މެސީގެ ޝަރަފުގައި ކުޅުން މެދުކަނޑާލި ވަގުތު، ކޯޗު ލިއޮނެލް ސްކަލޯނީއަށް ވަނީ ކަރުނަ ހިފަހައްޓަން ދަތިވެފައެވެ. މެޗަށްފަހު ވާހަކަދައްކަމުން ސްކަލޯނީ ބުނީ މެސީ ފަދަ މޮޅު ކުޅުންތެރިއަކަށް ކޯޗުކޮށްދިނުމުގެ ފުރުޞަތު ލިބުމަކީ އޭނާއަށް ލިބުނު ވަރަށް ބޮޑު ޝަރަފެއް ކަމަށެވެ. އަދި ރޭވިފައިވާ ގޮތަށް ކަންކަން ކުރިއަށްދާނަމަ، އާޖެންޓީނާގެ ކޯޗުކަމުގައި ދެމިހުންނާނެ ކަމަށްވެސް އޭނާ ބުންޏެވެ.
މީގެއިތުރުން، ޒުވާން ތަރި އެންޒޯ ފެނާންޑޭޒާއި ޑިފެންޑަރު ލިސަންދްރޯ މާޓިނޭޒްވެސް ވަނީ މެސީގެ ވަކިވުމާއެކު ހިތާމަފާޅުކޮށް، މެސީއަކީ އެމީހުންގެ ނަމޫނާ ކަމަށާއި އޭނާ ދެކެ ނުހަނު ލޯބިވާކަން ހާމަކޮށްފައެވެ.
ބެނިންއާ ދެކޮޅަށް ކުޅުނު މެސީގެ ވަދާއީ މެޗު އާޖެންޓީނާއިން ކާމިޔާބުކުރީ 3-0 ގެ ނަތީޖާއަކުންނެވެ. މި މެޗުގައި މެސީ ވަނީ ލަނޑެއް ޖެހުމުގެ އިތުރުން އަނެއް ދެ ލަނޑު ޖެހުމަށް ފުރުޞަތު ތަނަވަސްކޮށްދީފައެވެ. މެސީ ޤައުމީ ޓީމުގެ ޖަރޒީ ބޭލީ ޤައުމަށް 21 އަހަރުގެ ދިގު އަދި އަގުހުރި ޚިދުމަތްތަކެއް ކޮށްދިނުމަށްފަހުގައެވެ.
