ދުނިޔޭގެ ފުޓުބޯޅައިގެ ތާރީޚުގައި އުފެދުނު އެންމެ ކާމިޔާބު އެއް ކުޅުންތެރިޔާ ކަމަށްވާ އާޖެންޓީނާގެ ކެޕްޓަން ލިއޮނެލް މެސީ، ޤައުމީ ޓީމުގެ ޖާޒީގައި ފެންނާނެ އެންމެ ފަހު މެޗާއި، އެ މެޗުގައި އޭނާ ބޭނުންކުރާނެ ޚާއްޞަ ޖާޒީ މިހާރު ވަނީ ހާމަކޮށްފައެވެ.
އަންނަ މަހު ކުޅުމަށް ހަމަޖެހިފައިވާ އޭނާގެ ވަދާޢީ މެޗަށް ޚާއްޞަކޮށްގެން މަޝްހޫރު ބްރޭންޑް އެޑިޑާސްއިން ފަރުމާކޮށްފައިވާ މި ޖާޒީ، މެސީ ވަނީ އޭނާގެ ރަސްމީ އިންސްޓަގްރާމް އެކައުންޓް މެދުވެރިކޮށް ސަޕޯޓަރުންނަށް ދައްކާލާފައެވެ. މި ޖާޒީ ޢާންމުކުރަމުން، އުމުރުން 39 އަހަރުގެ މެސީ ބުނެފައިވަނީ މިއީ އޭނާގެ ޤައުމީ ޓީމުގެ އެންމެ ފަހު މެޗު ކަމަށާއި، މި ޖާޒީ ވެގެންދާނީ އޭނާގެ މުޅި ޙަޔާތުގައިވެސް ނުހަނު ޚާއްޞަ އެއްޗަކަށް ކަމަށެވެ.
މި ޖާޒީ ފަރުމާކޮށްފައިވަނީ އާޖެންޓީނާގެ ސަޤާފީ އުޑުނޫ ކުލައާއި ހުދު ކުލަ ހިމަނައިގެން ނަމަވެސް، މެސީގެ ވަދާޢީ މެޗާ ގުޅުވައިގެން މީގައި ތަފާތު އަދި ފާހަގަކޮށްލެވޭ ބަދަލުތަކެއް ވަނީ ގެނެސްފައެވެ. އެގޮތުން ޖާޒީގެ ފަހަތުގައި މެސީގެ ނަމާއި އޭނާގެ މަޝްހޫރު ނަންބަރު 10 ފަވާލާފައިވަނީ ރަން ކުލައިންނެވެ. މީގެ އިތުރުން، ނަމުގެ މަތީގައި އާޖެންޓީނާގެ ޤައުމީ ދިދައިގައި ހިމެނޭ “ސަން އޮފް މޭ” (އިރުގެ ނިޝާން) ހިމަނާފައިވާއިރު، ޖާޒީގެ ފަހަތުގައި ޚާއްޞަ ކުރެހުމެއްވެސް ވަނީ ހިމަނާފައެވެ.
